Sóttkví fyrir innflutta búrfugla lokað

Eins og Matvælastofnun greindi frá með fréttatilkynningu þann 27. júní sl. stóð til að aflífa búrfugla sem verið höfðu í sóttkví hjá innflytjanda frá því 14. febrúar. Innfluttir búrfuglar skulu dvelja í sóttkví í a.m.k. 4 vikur en á þriðju viku einangrunar greindist smit í sóttkvínni og því var einangrunin framlengd. Þann 26. mars hafnaði Matvælastofnun innflutningnum og gaf innflytjanda kost á að flytja fuglana úr landi ellegar aflífa þá. Innflytjandi fór fram á endurupptöku málsins en henni var hafnað. Lagði innflytjandi þá fram stjórnsýslukæru til atvinnuvega- og nýsköpunarráðuneytisins og óskaði eftir frestun réttaráhrifa og varð ráðuneytið við því. Við eftirlit í sóttkvínni þann 22. júní kom í ljós að um þriðjung þeirra fugla sem áttu að vera eftir í sóttkvínni vantaði og hafði innflytjandi ekki gert Matvælastofnun grein fyrir afdrifum þeirra. Vegna brota á skilyrðum innflutningleyfisins afturkallaði stofnunin leyfið. Ekki var unnt að senda fuglana aftur til upprunalands vegna skilyrða þarlendra dýralæknayfirvalda um heilbrigðisvottun og því hugðist Matvælastofnun aflífa þá fugla sem eftir voru í sóttkvínni.

Vegna andmæla innflytjanda varð ekkert úr því þann 27. júní. Þann 2. júlí afturkallaði atvinnuvega- og nýsköpunarráðuneytið frestun réttaráhrifa vegna fyrri ákvörðunar Matvælastofnunar og í kjölfar þess náðist sátt á milli stofnunarinnar og innflytjanda um aflífun. Aflífun fór fram í dag, 6. júlí, og tekin voru sýni sem rannsökuð verða í þeirri von að finna skýringar á þeim miklu afföllum sem urðu í sóttkvínni. Að loknum þrifum og sótthreinsun verður sóttkvíin innsigluð í a.m.k. 30 daga.