Fara í efni

Útflutningur hunda

Fylgdu eftirfarandi leiðbeiningum til að flytja út hund. Ef þú ert með spurningar, ræddu við okkur í gegnum netspjallið neðst til hægri á síðunni. Netspjallið er opið/birt alla virka daga frá kl. 9-12 og 13-15.

  • Ólíkar reglur gilda um útflutning hunda, eftir því um hvaða land er að ræða.
  • Samræmdar kröfur gilda um innflutning hunda til landa innan Evrópusambandsins, Noregs og Sviss en ólíkar reglur gilda um vottun eftir því hvort þeir ferðast í fylgd eiganda síns (non-commercial import) eða ef flutningur er vegna eigendaskipta/sölu á hundinum (commercial import). Eftirlit á landamærum ESB er mjög strangt og uppfylli hundar ekki ítrustu kröfur getur það haft þær afleiðingar að þeir eru sendir til baka eða þurfa að sæta einangrun í skemmri eða lengri tíma.
  • Fyrir áritun vottorða eða skoðun vegna útflutnings hjá Matvælastofnun, skal panta tíma með því að fylla út eyðublað 2.40 eða 2.37 í þjónustugátt MAST (sjá nánari skýringar að neðan).
  • Við mælum með því að hafa samband við dýralækni á áfangastað til að fá upplýsingar um sníkjudýr sem gæludýrin ykkar gætu orðið fyrir úti: 

ESB/Noregur/Sviss - hundur ferðast með eiganda

Eftirfarandi skilyrði gilda um hunda sem fluttir eru til ESB/Noregs/Sviss í fylgd eiganda síns eða umboðsmanns hans ef eigandi ferðast sömu leið innan 5 daga fyrir eða eftir flutningsdag hunds (non-commercial import). Ef eigendaskipti (sala) eiga sér stað í tengslum við flutning skal fylgja leiðbeiningum vegna ESB, Noregur, Sviss - flutningur vegna sölu á hundi 

  1. Hundurinn skal vera örmerktur.
  2. Hundurinn skal vera bólusettur gegn hundaæði og skal hafa náð 12 vikna aldri við bólusetningu. 
  3. Í fyrsta lagi 21 degi eftir bólusetningu getur dýralæknir gefið út heilbrigðisvottorð vegna útflutnings.
  4. Vegna útflutnings til Noregs, Írlands, Finnlands og Möltu er gerð krafa um bandormahreinsun. Hún skal fara fram í mesta lagi 5 dögum fyrir útflutning en þó ekki á síðasta sólarhringnum fyrir brottför.
  5. Vottorðið skal yfirfarið og áritað af dýralækni hjá Matvælastofnun í mesta lagi 10 dögum fyrir brottför (sjá nánar um vottorð hér að neðan)
  6. Panta þarf tíma fyrir áritun heilbrigðisvottorðs með því að fylla út eyðublað 2.40 í þjónustugátt MAST. Áritun fer fram hjá umdæmisskrifstofum á Laugavegi 166, Reykjavík; Sæmundargötu 1, Sauðárkróki; Furuvöllum 1, Akureyri og Austurvegi 64, Selfossi.  
  7. Hafa skal meðferðis vottorð undirritað af dýralækni og heilsufarsbók hundsins þar sem fram koma upplýsingar um örmerki og bólusetningu gegn hundaæði. 
  8. Gjald fyrir áritun er 5.081 kr. Athugið að hér er um að ræða lágmarksgjald sem miðast við að fullnægjandi upplýsingar og gögn séu lögð fram innan viðeigandi tímaramma. Sé svo ekki getur það haft aukinn kostnað í för með sér og innheimt er fyrir slíkt skv. tímagjaldi. 

Nánari upplýsingar

  • Örmerki: dýrið skal vera örmerkt áður en það er bólusett.
  • Hundaæðisbólusetning: lágmarksaldur hunda og katta fyrir bólusetningu gegn hundaæði er 12 vikur.  Flytja má hundinn út í fyrsta lagi 21 degi eftir bólusetningu gegn hundaæði. Hafið samband við dýralækni í tæka tíð til þess að panta bóluefni (sérpanta þarf hundaæðisbóluefni fyrir hvert og eitt dýr). 
  • Undanþágur frá hundaæðisbólusetningu: eftirtalin lönd heimila innflutning óbólusettra hvolpa og kettlinga sem eru yngri en 12 vikna gömul: 1) Austurríki (sækja þarf um undanþágu til dýralæknayfirvalda), 2) Tékkland, 3) Danmörk, 4) Eistland, 5) Litháen og 6) Sviss. Athugið að þessi landalisti getur breyst fyrirvaralítið en uppfærðan lista má sjá hér (dálkur 2, article 11 of regulation (EU) No 567/2013). Slíkur innflutningur er heimilaður ef annað hvort; (a) ræktandi leggur fram yfirlýsingu um að dýrið hafi ekki komist í kynni við dýr sem voru mögulega smituð af hundaæði, eða(b) dýrið er flutt inn ásamt móður sinni sem hefur verið bólusett gegn hundaæði í samræmi við innflutningskröfur. ATH! Þetta gildir eingöngu fyrir þau dýr sem ferðast á sk. non-commercial vottorði. Vottorð fyrir hvolpa yngri en 12 vikna.
  • Bandormahreinsun: þau lönd þar sem bandormurinn Echinococcus multilocularis finnst ekki, gera kröfu um bandormahreinsun hunda fyrir innflutning. Um er að ræða Noreg, Bretland, Írland, Finnland og Möltu. Þetta skal gera 1-5 sólarhringum fyrir innflutning, þ.e. má ekki gerast á síðasta sólarhringnum. 
  • Eigandi dýrs: sá sem fylgir hundinum í flug (eða skip) skal vera skráður bæði sendandi og viðtakandi (consignor og consignee) á vottorðinu. Sá hinn sami skal einnig undirrita yfirlýsingu á bls 6 í vottorðinu. 
  • Útflutningsvottorð: nota skal þetta eyðublað fyrir sk. "non-commercial" vottorð (6 síður) sem gefið er út af Matvælastofnun skv reglum ESB þar að lútandi. Mælt er með því að fylla inn upplýsingarnar í tölvu (ekki handskrifa). Dýralæknir fyllir út vottorðið og svo þarf áritun og stimpil hjá opinberum dýralækni, þ.e. hjá Matvælastofnun (Laugavegi 166 í Reykjavík, Austurvegi 64,  Selfossi eða á umdæmisskrifstofum). Vottorð þessi sem eru ígildi evrópska gæludýravegabréfsins veita inngöngu í ESB, Noreg og Sviss í 10 daga eftir útgáfu, og gilda í 4 mánuði fyrir ferðalög innan ESB. Sé ekki staðið rétt að útgáfu útflutningsvottorðs gæti dýrið verið stöðvað á landamærum móttökulands og jafnvel þurft að sæta einangrun.
  • Ítarlegar leiðbeiningar um útfyllingu "non-commercial" vottorðs

ESB/Noregur/Sviss - fylgdarlaus hundur eða eigendaskipti

Eftirfarandi skilyrði gilda ef flutningur hundsins er í tengslum við eigendaskipti (sölu), einnig ef hundurinn er fluttur án fylgdarmanns, þ.e. sem frakt (commercial import).

  1. Hundurinn skal vera örmerktur.
  2. Hundurinn skal vera bólusettur gegn hundaæði og verður að hafa náð 12 vikna aldri við bólusetningu. Bólusetning skal fara fram a.m.k. 21 degi fyrir útflutning (í mesta lagi ári fyrir).  
  3. Innan við 48 tímum fyrir brottför skal hundurinn heilbrigðisskoðaður af eftirlitsdýralækni hjá Matvælastofnun, inn- og útflutningsdeild, Laugavegi 166, Reykjavík. Heilbrigðisvottorð er gefið út að skoðun lokinni.
  4. Sé hundurinn að fara til Noregs, Bretlands, Írlands, Finnlands eða Möltu skal hundurinn meðhöndlaður gegn bandormum. Útflytjandi skal afla bandormalyfs (t.d. Drontaste) fyrir hundinn hjá sínum dýralækni og hafa meðferðis þegar hann mætir í heilbrigðisskoðun hjá MAST.
  5. ATH!! Í þessum tilfellum þarf þjónustudýralæknir ekki að gefa út vottorð þar sem útflutningsvottorð er gefið út af MAST.

Panta þarf tíma í heilbrigðisskoðun með því að fylla út eyðublað 2.37 í þjónustugátt. Eftirfarandi upplýsingar skulu liggja fyrir þegar sótt er um í þjónustugátt

  • Nafn og heimilisfang útflytjanda
  • Nafn og heimilisfang viðtakanda
  • Flugupplýsingar (flugnúmer, dags., tími, farmbréfsnúmer (AWB), komustaður, flugvöllur)
  • Örmerkisnúmer hunds
  • Dagsetning örmerkingar eða síðasta aflesturs örmerkis. Hundurinn skal hafa verið örmerktur fyrir bólusetningu gegn hundaæði. Ef dagsetning örmerkingar er ekki þekkt þá skal skrá dagsetningu bólusetningar hundaæðis. Dýralæknir skal lesa örmerkið á sama tíma og hundurinn er bólusettur.
  • Bólusetning gegn hundaæði (heiti bóluefnis, lotunúmer, dagsetning bólusetningar, gildistími bólusetningar)

Þegar umsókn hefur verið móttekin mun Matvælastofnun hafa samband við útflytjanda til þess að bóka tíma fyrir heilbrigðisskoðun og útgáfu vottorðs á Laugavegi 166 í Reykjavík. Afgreiðslutími er virka daga frá kl. 9-12 og 13-15. Athugið að brottför á mánudagsmorgni er ekki möguleg þar sem heilbrigðisskoðun þarf að fara fram innan 48 tíma fyrir brottför.

Gjald fyrir heilbrigðisskoðun og vottorð er 10.162 kr. Athugið að hér er um að ræða lágmarksgjald sem miðast við að fullnægjandi upplýsingar og gögn séu lögð fram innan viðeigandi tímaramma. Sé svo ekki getur það haft aukinn kostnað í för með sér og innheimt er fyrir slíkt skv. tímagjaldi. 

Bretland - hundur ferðast með eiganda

Bretland er ekki hluti af Evrópusambandinu en sambærileg skilyrði og vegna innflutnings til ESB verða þó áfram í gildi. Útflytjandi skal ávallt kynna sér reglurnar á vef breskra yfirvalda.

Eftirfarandi skilyrði gilda um hunda sem fluttir eru til Bretlands í fylgd eiganda síns eða umboðsmanns hans ef eigandi ferðast sömu leið innan 5 daga fyrir eða eftir flutningsdag hunds (non-commercial import). Ef eigendaskipti (sala) eiga sér stað í tengslum við flutning skal fylgja leiðbeiningum vegna Bretland - flutningur hunds án fylgdar eða vegna eigendaskipta.

  1. Hundurinn skal vera örmerktur.
  2. Hundurinn skal vera bólusettur gegn hundaæði og skal hafa náð 12 vikna aldri við bólusetningu. 
  3. Í fyrsta lagi 21 degi eftir bólusetningu getur dýralæknir gefið út heilbrigðisvottorð vegna útflutnings.
  4. Hundurinn skal meðhöndlaður gegn bandorminum Echinococcus multilocularis. Ormahreinsun skal fara fram í mesta lagi 5 dögum fyrir útflutning en þó ekki á síðasta sólarhringnum fyrir brottför (24 til 120 klukkutímum fyrir brottför).
  5. Vottorðið skal yfirfarið og áritað af dýralækni hjá Matvælastofnun í mesta lagi 5 dögum fyrir brottför (sjá nánar um vottorð hér að neðan)
  6. Panta þarf tíma fyrir áritun heilbrigðisvottorðs með því að fylla út eyðublað 2.40 í þjónustugátt MAST. Áritun fer fram hjá umdæmisskrifstofum á Laugavegi 166, Reykjavík; Sæmundargötu 1, Sauðárkróki; Furuvöllum 1, Akureyri og Austurvegi 64, Selfossi. 
  7. Hafa skal meðferðis vottorð undirritað af dýralækni og heilsufarsbók þar sem fram koma upplýsingar um örmerki og bólusetningu gegn hundaæði. 
  8. Gjald fyrir áritun er 5.081 kr. Athugið að hér er um að ræða lágmarksgjald sem miðast við að fullnægjandi upplýsingar og gögn séu lögð fram innan viðeigandi tímaramma. Sé svo ekki getur það haft aukinn kostnað í för með sér og innheimt er fyrir slíkt skv. tímagjaldi.

Nánari upplýsingar

  • Örmerki: dýrið skal vera örmerkt áður en það er bólusett.
  • Hundaæðisbólusetning: lágmarksaldur hunda fyrir bólusetningu gegn hundaæði er 12 vikur.  Flytja má hundinn út í fyrsta lagi 21 degi eftir bólusetningu gegn hundaæði. 
  • Fylgdarmaður dýrs: sá sem fylgir hundinum í flug (eða skip) skal vera skráður bæði sendandi og viðtakandi (consignor og consignee) á vottorðinu. Sá hinn sami skal einnig undirrita yfirlýsingu á síðustu síðu vottorðsins.
  • Útflutningsvottorð: Vottorð vegna útflutnings á hundi / ketti með fylgd til Bretlands. Dýralæknir fyllir út vottorðið og svo þarf áritun og stimpil hjá opinberum dýralækni, þ.e. hjá Matvælastofnun (Laugavegi 166, Reykjavík, Austurvegi 64, Selfossi eða á umdæmisskrifstofum). Vottorðið gildi í 10 daga eftir útgáfu. Sé ekki staðið rétt að útgáfu útflutningsvottorðs gæti dýrið verið stöðvað á landamærum móttökulands og jafnvel þurft að sæta einangrun.

Bretland - fylgdarlaus hundur eða eigendaskipti

  • Ef þú ert að flytja hund frá Íslandi til Bretlands án fylgdar telst það vera innflutningur í atvinnuskyni. Fylgja þarf ferlinu hér að neðan. Varðandi skatta og gjöld, vinsamlegast hafðu samband við HMRC
  • Panta þarf tíma í heilbrigðisskoðun með því að fylla út eyðublað 2.37 í þjónustugátt. 
  • Þetta er listi yfir flugfélög og komuflugvelli fyrir gæludýraflutning:
  • Skilyrði er að þetta vottorð fylgi dýrinu og skal það gefið út af dýralæknayfirvöldum á Íslandi.
  • Viðskiptaferli: Kröfur um útflutning hunda, katta og fretta eru settar fram í Import Information Note (IIN) BLLV/5b.
  • Tilkynning til breskra dýralæknayfirvalda (APHA um innflutning: Innflutning lifandi dýra skal tilkynna APHA á hér.
  • Tilkynna skal um innflutninginn að minnsta kosti einum virkum degi áður en búist er við að dýrið/dýrin komi á komustað
  • Þegar innflutningstilkynning hefur verið send færðu útgefið tilkynningarnúmer (UNN) Snið þessa númers verður CHEDA.GB.2024.XXXXXXX og skal framvísa því til útflytjanda og opinbers dýralæknis sem mun bæta því við heilbrigðisvottorð fyrir dýrið þitt og gefa þér afrit.
  • Skannað afrit af undirrituðu heilbrigðisvottorðinu skal síðan hlaðið upp á IPAFFS af útflytjanda/innflytjanda.

Gjald fyrir heilbrigðisskoðun og vottorð er 10.162 kr. Athugið að hér er um að ræða lágmarksgjald sem miðast við að fullnægjandi upplýsingar og gögn séu lögð fram innan viðeigandi tímaramma. Sé svo ekki getur það haft aukinn kostnað í för með sér og innheimt er fyrir slíkt skv. tímagjaldi.

Útflutningur katta og hunda til annarra landa

Þeir sem hyggjast flytja dýr úr landi verða að kynna sér innflutningsreglur viðkomandi lands með góðum fyrirvara. Þessar reglur og leiðbeiningar eru almennt aðgengilegar á netinu af lögbæru yfirvaldi í hverju landi, til dæmis: