Dýralæknisleyfi og tilkynningarskylda dýralækna
Sækja um íslenskt dýralæknisleyfi
Ef sækja á um íslenskt dýralæknisleyfi þarf umsækjandi að fylla út umsókn nr. 10.07 í þjónustugátt Matvælastofnunar og skila þar inn afriti af prófskírteini. Hafi umsækjandi ekki íslenska kennitölu er hægt að fylla út eyðublað sem er að finna hér á ensku útgáfu vefsíðunnar.
Matvælastofnun metur hvort dýralæknisprófið sé fullnægjandi og fengið frá skóla innan Evrópska efnahagssvæðisins (EES). Í þeim tilfellum sem dýralæknisprófið er fengið utan EES óskar Matvælastofnun eftir mati dýralæknaráðs.
Þegar staðfest hefur verið að dýralæknisprófið sé fullnægjandi þarf umsækjandi að kynna sér íslensk lög og reglugerðir sem sannreynt er með viðtali við fulltrúa Matvælastofnunar. Einnig þarf umsækjandi að fá kennslu í gangagrunninum Heilsu, sem er sjúkdóma- og lyfjaskráningarkerfi stofnunarinnar.
Gjald er tekið fyrir veitingu dýralæknisleyfis. Gjaldtaka fyrir eftirlit og aðra gjaldskylda starfsemi Matvælastofnunar s.s. útgáfu leyfa, vottorða, skráningar o.fl. fer skv. gjaldskrá Matvælastofnunar. Reikningar Matvælastofnunar eru rafrænir og birtir á Ísland.is. Krafa birtist jafnframt í netbanka viðkomanda.
Tilkynningarskylda dýralækna
Dýralækni er skylt að tilkynna Matvælastofnun grun um tilkynningaskyldan sjúkdóm eða ef tilkynningarskyldur sjúkdómur greinist í dýrum, skv. reglugerð um tilkynningar- og skráningarskylda dýrasjúkdóma, nr. 52/2014. Nánari upplýsingar um viðbröð við dýrasjúkdómum finnast á hér.
Dýralækni er skylt að tilkynna Matvælastofnun um störf dýralækna skv. lögum um dýralækna og heilbrigðisþjónustu við dýr, nr. 66/1998.
Dýralæknir á að tilkynna:
- þegar hann hyggst hefja dýralæknisstörf
- aðsetur starsemi sinnar
- flutning aðseturs
- starfslok sem dýralæknir
Tilkynning 10.17 Tilkynning um störf dýralækna og aðsetur er að finna í þjónustugáttinni.