Dýraafurðir frá EES sem eiga uppruna í 3. ríkjum

Lög um dýrasjúkdóma kveða á um skilyrði um eftirtaldar búfjárafurðir sem framleiddar eru í 3. ríkjum* og fluttar eru til Íslands, hvort sem um er að ræða beinan innflutning eða innflutning í gegnum annað EES ríki. 

*Undanskildar eru afurðir framleiddar í Bretlandi, Sviss, Grænlandi og Færeyjum

• Kjöt, unnið sem óunnið, innmatur, sláturúrgangur sem ekki hefur hlotið hitameðferð (72°C í 15 sek. eða sambærilega meðferð)
• Egg, eggjaskurn og eggjaafurðir sem ekki hafa hlotið hitameðferð (65°C í 5 mínútur eða sambærilega meðferð)
• Ógerilsneydda mjólk og mjólkurafurðir. 
• Dýrafóður sem inniheldur hráar dýraafurðir.

Hrátt (óhitameðhöndlað) kjöt og kjötafurðir með uppruna í 3ju ríkjum

1. Sækja skal um innflutningsleyfi (forskráningu) áður en varan er send til landsins. Nota skal umsókn nr. 4.51 í þjónustugátt. Eftirfarandi upplýsingar skulu koma fram í umsókn: Innflytjandi ( nafn og heimilisfang), framleiðandi (nafn og heimilisfang), samþykkisnúmer framleiðanda (EU approval number),  vörutegund/heiti. Leyfisumsókn er tekin til meðferðar skv. 4. grein reglugerðar nr. 1250/2019 um varnir gegn því að dýrasjúkdómar og sýktar afurðir berist til landsins. Innflutningsleyfi skal liggja fyrir áður en vara er send til landsins.
2. Hafi sendingin staðist landamæraeftirlit inn á ESB/EES í öðru EES ríki skal tilkynna innflutninginn í þjónustugátt með tilkynningu nr. 4.33 og leggja fram nauðsynleg fylgigögn (sjá fyrir neðan). 

Hitameðhöndlað / unnið kjöt, ostur, hunang og aðrar dýraafurðir svo sem veiðiminjar

1. Hafi sendingin staðist landamæraeftirlit inn á ESB/EES í öðru EES ríki skal tilkynna innflutninginn í þjónustugátt með tilkynningu nr. 4.32 og leggja fram nauðsynleg fylgigögn (sjá fyrir neðan).

Eftirtalin skjöl skulu fylgja tilkynningu, eins og við á:

• Sundurliðaður vörureikningur
• CHED  (common health entry document: samræmda dýraheilbrigðis- og innflutningsvottorðið: vottorð gefið út í Traces til staðfestingar á því að vara/sending hafi staðist landamæraeftirlit inn á EES svæðið).
  • Hráar kjötafurðir (tollflokkar 0202, 0203, 0204, 0207, 0208): 1) vottorð (rannsóknarniðurstöður) sem staðfestir að vörurnar séu lausar við salmonellusýkla; 2) staðfestingu framleiðanda á því að kjötið hafi verið geymt við a.m.k. -18°C í 30 daga fyrir tollagreiðslu
  • Unnar kjötvörur (tollflokkar 0210, 1601, 1602): skila skal inn staðfestingu framleiðanda á öðru af eftirfarandi: 1) hitameðferð: kjarnhiti hefur náð 72°C í 15 sekúndur; eða 2) gerjun/þroskun: varan hafi aw gildi lægra eða jafnt og 0,93 og pH gildi lægra eða jafnt og 6,0 
  • Mjólkurafurðir: staðfesting framleiðanda á gerilsneyðingu
  • Egg: hitameðferð þannig að varan hafi verið hituð í 65°C í fimm mínútur eða hlotið sambærilega meðferð að mati Mast.
  • Þurrkað kjöt: kjötið skal hafa hlotið meðferð sem að mati Mast fullnægjandi sem fyrirbyggjandi meðferð sbr. aðferðir hér að ofan.
  • Ostar (tollflokkar 0406.2000 og 0406.3000) skulu hafa hlotið viðeigandi meðferð þannig að ostamassinn hefur fengið hitameðhöndlun að lágmarki 48°C, varan hafi verið geymd í a.m.k. 6 mánuði við hitastig sem er ekki lægra en 10°C og með rakastig minna en 36%.

  • Hrátt gæludýrafóður: Opinbert uppruna- og heilbrigðisvottorð, þ.e. CHED sem sýnir fram á að varan hafi staðist landamæraskoðun við komu til EES.