Fara í efni

Útflutningur katta

Ef flytja á kött úr landi skal kynna sér reglur viðkomandi móttökuríkis. Skilyrðin geta verið mjög ólík hvað varðar bólusetningar, sýnatökur, vottorð og fleira. Mælt er með því að afla upplýsinga á opinberum vefsíðum viðkomandi ríkis, þ.e. dýralæknayfirvalda í viðkomandi landi og hefja undirbúning í samráði við dýralækni tímanlega. 

Evrópusambandið, Noregur, Sviss - köttur fluttur með fylgd

  • Samræmdar kröfur gilda um innflutning hunda og katta til landa innan Evrópusambandsins, Noregs og Sviss. 
  • Eftirlit á landamærum er mjög strangt og vottorð sem ekki uppfylla ítrustu kröfur geta haft þær afleiðingar að viðkomandi dýr er sent til baka eða þarf að sæta einangrun í skemmri eða lengri tíma.
  • Ólíkar reglur gilda um flutning katta eftir því hvort þeir ferðast í fylgd með eiganda/útflytjanda eða eru fluttir án fylgdar t.d. með frakt.
  • Kötturinn skal vera örmerktur og bólusettur gegn hundaæði. Í fyrsta lagi 3 vikum (21 degi) eftir bólusetningu skal heilbrigðisvottorð vegna útflutnings gefið út af dýralækni. 
  • Vottorðið skal svo yfirfarið og áritað af opinberum dýralækni (Matvælastofnun). 

Nánari upplýsingar

  • Örmerki: dýrið skal vera örmerkt áður en það er bólusett.
  • Hundaæðisbólusetning: lágmarksaldur hunda og katta fyrir bólusetningu gegn hundaæði er 12 vikur. Flytja má köttinn út í fyrsta lagi 21 degi eftir bólusetningu gegn hundaæði. Hafið samband við dýralækni í tæka tíð til þess að panta bóluefni (sérpanta þarf hundaæðisbóluefni fyrir hvert og eitt dýr). 
  • Undanþágur frá hundaæðisbólusetningu: eftirtalin lönd heimila innflutning óbólusettra hvolpa og kettlinga sem eru yngri en 12 vikna gömul: 1) Austurríki (sækja þarf um undanþágu til dýralæknayfirvalda), 2) Tékkland, 3) Danmörk, 4) Eistland, 5) Litháen og 6) Sviss. Athugið að þessi landalisti getur breyst fyrirvaralítið en uppfærðan lista má sjá hér (dálkur 2, article 11 of regulation (EU) No 567/2013). Slíkur innflutningur er heimilaður ef annað hvort; (a) ræktandi leggur fram yfirlýsingu um að dýrið hafi ekki komist í kynni við dýr sem voru mögulega smituð af hundaæði, eða(b) dýrið er flutt inn ásamt móður sinni sem hefur verið bólusett gegn hundaæði í samræmi við innflutningskröfur. ATH! Þetta gildir eingöngu fyrir þau dýr sem ferðast á sk. non-commercial vottorði. Sá hinn sami skal einnig undirrita yfirlýsingu á bls 6 í vottorðinu.
  • Fylgdarmaður dýrs: sá sem fylgir kettinum í flug (eða skip) skal vera skráður bæði sendandi og viðtakandi (consignor og consignee) á vottorðinu.
  • Útflutningsvottorð: nota skal þetta eyðublað fyrir sk. "non-commercial" vottorð (6 síður) sem gefið er út af Matvælastofnun skv reglum ESB þar að lútandi. Dýralæknir fyllir út vottorðið og svo þarf áritun og stimpil hjá opinberum dýralækni, þ.e. hjá Matvælastofnun (Dalshrauni 1b í Hafnarfirði, Austurvegi 64,  Selfossi eða á umdæmisskrifstofum). Vottorð þessi sem eru ígildi evrópska gæludýravegabréfsins veita inngöngu í ESB, Noreg og Sviss í 10 daga eftir útgáfu, og gilda í 4 mánuði fyrir ferðalög innan ESB.
  • Útfyllt og undirritað vottorð ásamt heilsufarsbók þar sem fram koma upplýsingar um örmerki og bólusetningu gegn hundaæði, skal leggja fram hjá Matvælastofnun til áritunar. Slík áritun fer fram á öllum skrifstofum MAST (aðalskrifstofu, Markaðsstofu og umdæmisstofum) á virkum dögum og kostar 1904 kr. 
  • Ítarlegar leiðbeiningar um útfyllingu "non-commercial" vottorðs

Evrópusambandið, Noregur, Sviss - köttur fluttur án fylgdar

  • Samræmdar kröfur gilda um innflutning hunda og katta til landa innan Evrópusambandsins, Noregs og Sviss. 
  • Ólíkar reglur gilda um flutning katta eftir því hvort þeir ferðast í fylgd með eiganda (útflytjanda) eða eru fluttir án fylgdar t.d. með frakt.
  • Kötturinn skal vera örmerktur og bólusettur gegn hundaæði en flytja má köttinn út í fyrsta lagi 21 degi eftir bólusetningu. 
  • Innan við 48 tímum fyrir brottför skal kötturinn heilbrigðisskoðaður af dýralækni og heilbrigðisvottorð gefið út. 
  • 24-48 tímum fyrir brottför skal leggja fram eftirfarandi gögn til Matvælastofnunar, Dalshrauni 1B, Hafnarfirði: 1) heilbrigðisvottorð þar sem fram kemur staðfesting á heilbrigðisskoðun, hundaæðisbólusetningu og ormahreinsun (ef við á) auk upplýsinga um sendanda og viðtakanda kattar og farmbréfsnúmer; 2) heilsufarsbók þar sem fram koma upplýsingar um örmerki og bólusetningu gegn hundaæði.
  • Endanlegt heilbrigðisvottorð er gefið út af Matvælastofnun í Traces (tölvukerfi til skráningar á innflutningi dýra og dýraafurða til ESB). 
  • Frumrit vottorðsins skal fylgja kettinum við útflutning. 
  • ATH! Útflutningur með þessum hætti getur ekki átt sér stað á mánudagsmorgni þar sem heilbrigðisskoðun skal fara fram í síðasta lagi 48 klst fyrir útflutning og nauðsynlegt er að skila gögnum til MAST tímanlega. Útgáfa heilbrigðisvottorðs kostar 1904 kr.

Nánari upplýsingar

  • Örmerki: dýrið skal vera örmerkt áður en það er bólusett.
  • Hundaæðisbólusetning: lágmarksaldur hunda og katta fyrir bólusetningu gegn hundaæði er 12 vikur. Bólusetning skal fara fram a.m.k. 21 degi fyrir innflutning (að mesta lagi ári fyrir). Hafið samband við dýralækni í tæka tíð til þess að panta bóluefni (sérpanta þarf hundaæðisbóluefni fyrir hvert og eitt dýr). 

Bandaríkin 

 Vegna útflutnings á ketti til Bandaríkjanna þarf dýralæknir að gefa út heilbrigðis- og upprunavottorð þar sem eftirfarandi er staðfest:

- Að kötturinn hafi engin einkenni smitsjúkdóms.
- Að kötturinn hafi verið á Íslandi í a.m.k. 6 mánuði (eða frá fæðingu sé um yngra dýr að ræða)

Æskilegt er að vottorðið sé gefið út í mesta lagi 10 dögum fyrir brottför. Ekki er krafa um að vottorðið skuli áritað af dýralæknayfirvöldum.

ATH! Ekki er krafa um bólusetningu katta gegn hundaæði vegna flutnings frá Íslandi til Bandaríkjanna. Þó gera sum fylki kröfu um hundaæðisbólusetningu og mælt er með því að innflytjendur kanni skilyrði innflutnings á ákvörðunarstað.

Upplýsingar um innflutning gæludýra á vef CDC í Bandaríkjunum

Önnur lönd

Tenglar á vefsíður dýralæknayfirvalda þar sem finna má upplýsingar um innflutningsskilyrði gæludýra.

Uppfært 04.08.2020
Getum við bætt efni síðunnar?