Salmonella í nagbeini

Við reglubundið eftirlit Landbúnaðarstofnunar með gæludýrafóðri hefur fjölónæmur stofn af Salmonellu typhimurium greinst í nagbeini úr svínslegg sem var til sölu í gæludýraversluninni Tokyo, Hjallabraut 4, Hafnarfirði. Nagbeinin voru innflutt og hefur  um þriðjungur af síðustu sendingu verið seldur. Í samráði við innflytjanda hafa beinin nú verið tekin úr sölu og verður fargað. Salmonella typhimurium  getur valdið sýkingum í dýrum og í fólki.

Gæludýraeigendur sem kunna að hafa undir höndum umrædd nagbein úr svínslegg eru því hvattir til að skila þeim í verslunina Tokyo eða farga þeim með öruggum hætti.

Landbúnaðarstofnun mun áfram hafa eftirlit með gæludýrafóðri og taka fleiri sýni af fóðri til örverugreiningar.