Annar ólöglegur innflutningur notaðra reiðtygja

Í lok síðustu viku fékk Matvælastofnun tilkynningu frá Tollgæslunni í Reykjavík um sendingu frá Þýskalandi sem hafði að geyma reiðtygi. Matvælastofnun framkvæmdi skoðun sem staðfesti að um notuð reiðtygi væri að ræða. Í framhaldi af því var sendingin stöðvuð.

Stutt er síðan Matvælastofnun greindi frá ólöglegum innflutningi á notuðum reiðtygjum sem uppgötvaðist við innflutningseftirlit á Seyðisfirði 13. nóvember s.l. Um var að ræða hnakk, ólíkar gerðir múla, gjarðir, hlífar, píska, hestaábreiðu, reiðhanska o.fl. Matvælastofnun mun kæra málin tvö og er fyrirhugað að láta farga reiðtygjunum. 

Að gefnu tilefni vill Matvælastofnun árétta að samkvæmt lögum um dýrasjúkdóma og varnir gegn þeim (25/1993) er með öllu óheimilt að flytja notuð reiðtygi til landsins. Einnig er bannað að flytja inn notaða reiðhanska en annan notaðan reiðfatnað má flytja til landsins að uppfylltri kröfu um sótthreinsun.

Ítarefni

• Ólöglegur innflutningur á notuðum reiðtygjum
• Upplýsingar um smitvarnir til hestamanna sem ferðast til landsins
  
• Almennar upplýsingar um smitvarnir til hestamanna
  
• Smitvarnabæklingur Matvælastofnunar