Útflutningur á lambakjöti til Kína
Matvælastofnun hefur síðustu 3 – 4 ár ásamt atvinnuvega- og nýsköpunarráðuneytinu og utanríkisráðuneytinu unnið að gerð samnings um heilbrigðiskröfur og eftirlit með útflutningi lambakjöts frá Íslandi til Kína. Nýlega undirritaði Guðlaugur Þór Þórðarson, utanríkisráðherra, samninginn fyrir Íslands hönd. Í honum koma fram sérkröfur og skilyrði sem uppfylla þarf varðandi útflutning á lambakjöti til Kína.
Mikilvægustu sérkröfur Kínverja varða riðu. Einungis má flytja til Kína kjöt af lömbum sem fædd eru og alin á riðulausum svæðum og jafnframt eiga sláturhús, kjötpökkunarstöðvar og frystigeymslur að vera á riðulausum svæðum. Tryggja þarf fullkominn aðskilnað lamba af riðusvæðum og þeirra sem koma frá riðulausum svæðum í flutningum og í sláturhúsi. Kjötinu á að halda aðskildu frá öðru kjöti í vinnslu og í geymslum.
Mikil áhersla er á að rekjanleiki sláturlamba og afurða þeirra sé öruggur. Sláturlömbin eiga að vera yngri en 6 mánaða, þegar þeim er slátrað, eigi að flytja kjöt af þeim til Kína.
Önnur skilyrði:
- Garnaveiki hafi ekki greinst á bænum síðustu 12 mánuði
- Afurðastöðvar, sláturhús, stykkjunarstöðvar og frystigeymslur, skulu skráðar á opinberan lista í Kína
Afurðastöðvar sem vilja flytja út lambakjöt til Kína þurfa að sækja um til Matvælastofnunar að komast á opinberan lista yfir afurðastöðvar sem hafa leyfi til að flytja út lambakjöt til Kína. Nánari upplýsingar veitir markaðsstofa Matvælastofnunar.
Matvælastofnun vinnur nú að gerð heilbrigðisvottorða sem byggja á samningnum og þurfa að fylgja hverri sendingu.