Niðurstöður skimana vegna smitsjúkdóma í búfé

Yfirlit yfir niðurstöður skimana vegna smitsjúkdóma í búfé hafa nú verið settar á heimasíðu Matvælastofnunar, undir fyrirsögninni „eftirlitsniðurstöður“ á vinstri væng síðunnar. Þeir sjúkdómar sem vaktaðir eru með sýnatökum og rannsóknum á sýnum eru annars vegar sjúkdómar sem ekki finnast hér á landi og hins vegar sjúkdómar sem unnið er að útrýmingu á. Flestir þessara sjúkdóma eru þess eðlis að dýrin geta verið sýkt án þess að sjúkdómseinkenni komi fram. Vöktun hvað varðar aðra alvarlega smitsjúkdóma felst í almennu eftirliti og árvekni dýralækna og dýraeigenda. Samkvæmt lögum um dýrasjúkdóma og varnir gegn þeim, nr. 25/1993, ber hverjum þeim sem hefur ástæðu til að ætla að dýr sé haldið alvarlegum smitsjúkdómi að tilkynna það til dýralæknis eða lögreglu. Mjög fáir alvarlegir sjúkdómar eru landlægir og má eflaust þakka það legu landsins og ströngum reglum um innflutning lifandi dýra og dýraafurða.

Mikilvægt er að viðhalda þessari góðu stöðu þar sem smitsjúkdómar geta valdið dýrum þjáningum og sömuleiðis geta sjúkdómarnir valdið miklu tjóni. Tjónið felst m.a. í minni framleiðslu, kostnaði við útrýmingu sjúkdómsins, takmörkun á möguleikum á útflutningi o.s.frv.