Innflutningur notaðra landbúnaðartækja er bannaður án leyfis

Alltaf er nokkuð um það að fluttar séu inn notaðar landbúnaðarvélar og tæki en innflutningur þessi er bannaður, skv. 10. grein laga nr. 25/1993 um dýrasjúkdóma og varnir gegn þeim sbr. breytingu með 26. gr. laga nr. 87/1995, og 3. grein reglugerðar nr. 509/2004 j. liðar, um varnir gegn því að dýrasjúkdómar og sýktar afurðir berist til landsins.

Bann þetta er því ekkert nýtt af nálinni. Innflytjendur geta sótt um undanþágu frá innflutningsbanninu til landbúnaðarráðuneytisins skv. 8. gr. reglugerðar nr. 509/2004, sem þá skal afla umsagnar yfirdýralæknis hverju sinni. Skilyrði þau sem þá eru sett fram geta verið mismunandi eftir því um hvers konar vél er að ræða, hvaðan hún kemur o.s.frv.

Verklagsreglur embættis yfirdýralæknis varðandi umsóknir sem embættinu berast um innflutning notaðra landbúnaðartækja eru skýrar

• tækið skal vera þrifið vandlega og síðan sótthreinsað með viðurkenndum sótthreinsiefnum í útflutningslandinu
• þrif og sótthreinsun skulu vottuð af opinberum dýralæknayfirvöldum útflutningslandsins
• tækið skal flutt beint til Reykjavíkur eða Seyðisfjarðar til tollafgreiðslu
• tækið skal skoðað af embætti yfirdýralæknis (viðkomandi héraðsdýralækni) fyrir tollafgreiðslu
• séu þrif og sótthreinsun ekki fullnægjandi skal endurtaka verkið áður en viðkomandi tæki hlýtur tollafgreiðslu (þetta er ekki hægt á Seyðisfirði!)
• við innflutning á gripaflutningavögnum, hestakerrum o.þ.h. skal fjarlægja allt timbur og önnur þau efni sem ekki verða þvegin svo viðunandi sé
• einstaka sinnum er þess krafist að fulltrúi yfirdýralæknis taki þrif og hreinsun út í útflutningslandinu áður en útskipun fer fram, þetta á t.d. við um gripaflutningabifreiðar og -vagna vegna þess hve flókin og erfið slík farartæki eru í þrifum

Það er alfarið á ábyrgð innflytjanda að kynna sér hvaða reglur gilda og sækja um innflutningsleyfi í samræmi við ofangreind lög og reglugerðir. Vél eða tæki sem flutt er inn án leyfis landbúnaðarráðuneytisins er ólöglegt og innflutningurinn skýrt lögbrot.

Birt á vef Yfirdýralæknis þann 1. júní, 2005.