Hitastig í lönduðum afla seinni hluta júnímánaðar

Mikilvægustu þættirnir til að tryggja að íslenskar sjávarafurðir endi sem hágæðavara á borðum neytenda eru fólgnir í góðri meðhöndlun hráefnis allt  frá veiðum til vinnslu og dreifingar. Þar gegnir góð og hröð kæling aflans lykilhlutverki. Matvælastofnun (MAST) og Fiskistofa hafa fylgst með aflameðferð og hitastigi í lönduðum afla í sumar. Þ. 20. júní sl. birti MAST niðurstöður hitastigsmælinga fyrir fyrri helming júnímánaðar hér á heimasíðu sinni. Nú birtast hér niðurstöður tímabilsins frá 16. – 30. júní.   

Mælingar sýna að hitastig hefur hækkað um hálfa gráðu frá fyrri helmingi mánaðarins þegar litið er til allra mælinga. Mismunur þessi kemur einkum fram í hitastigi þess afla sem kældur er með ís eingöngu (þ.e. ekki í krapa) sem hefur hækkað um 0,8°C frá fyrri helmingi mánaðarins, þ.e. úr 2,6° í 3,4°C. Ljóst er að hitastig sjávar fer hækkandi og sjómenn þurfa að gera ráð fyrir að hitastig hækki enn í júlímánuði og verða því að auka við ísmagnið því hitastig í nýveiddum fiski er hið sama og í sjónum sem hann hefur haldið sig í. Einnig má gera ráð fyrir að umhverfishiti verði hærri í júlí en hann hefur verið í júní.

Þegar bornar eru saman hitastigsmælingar sem gerðar eru í afla strandveiðibáta annars vegar og í afla hefðbundinna dagróðrarbáta hins vegar, reynist hitastig vera að meðaltali í júní 2,6°C hjá strandveiðibátum en 2,9°C hjá dagróðrarbátum.

Starfsmenn MAST og Fiskistofu munu halda áfram mælingum á hitastigi í lönduðum afla í júlí og hvetja sjómenn til þess að bæta kælinguna enn frekar því ljóst er að hitastig sjávar mun hækka verulega í júlí.  MAST mun birta reglulega niðurstöður þessa eftirlits á heimasíðu sinni í sumar.

Sjómenn eru einnig hvattir til að kynna sér bæklinga MATÍS og annað útgefið efni um kælingu fisks. Á „kæligátt“ MATÍS www.kaeligatt.is má finna ýmsar leiðbeiningar um ísun og ísmagn sem þarf til kælingar sem og um annað er viðkemur góðri aflameðferð.