Tveir hundar teknir úr vörslu eigenda
Matvælastofnun framkvæmdi tvær vörslusviptingar á höfuðborgarsvæðinu í vikunni. Gripið var til tafarlausrar vörslusviptingar á hvolpi við eftirlit stofnunarinnar vegna alvarlegrar vanhirðu og vanfóðrunar.
Í lögum um velferð dýra segir: „Telji Matvælastofnun að úrbætur þoli enga bið getur stofnunin tekið dýr úr vörslu umráðamanns eða aflífað dýr sem hafa orðið fyrir varanlegum skaða sökum vanfóðrunar, harðýðgi, slysa eða slæms aðbúnaðar.“ Hvolpurinn var færður í hendur dýralækna til aðhlynningar en óljóst er á þessu stigi hvort hann nái sér á strik.
Í öðru máli voru hundur og köttur teknir úr vörslu eiganda vegna vanhirðu og slæms aðbúnaðar á heimili þeirra án þess að kröfur stofnunarinnar um úrbætur væru virtar.
Matvælastofnun vekur athygli á að við skoðun og eftirlit skal umráðamaður dýra veita án endurgjalds alla nauðsynlega aðstoð við eftirlitið, svo sem aðstoð starfsmanna, aðgang að húsakynnum og tækjabúnaði. Einnig ber að veita Matvælastofnun allar umbeðnar upplýsingar og afhenda öll þau gögn sem hafa þýðingu við eftirlitið.
Hvorki hundurinn né kötturinn voru á eftirlitsstað við framkvæmd vörslusviptingar og neitaði umráðamaður í fyrstu að veita upplýsingar um dvalarstað dýranna. Haft var uppi á hundinum en ekki hefur enn tekist að finna köttinn, áfram verður unnið að því þannig að hægt verði að koma honum til hjálpar.
Hundunum hefur verið komið fyrir á fósturheimilum til bráðabirgða með aðstoð Dýrahjálpar. Matvælastofnun þakkar Dýrahjálp fyrir aðkomu sína að málinu.