Merking fisks til ESB
Matvælastofnun vekur athygli þeirra sem flytja fisk og fiskafurðir til Evrópu á eftirfarandi:
Fiskafurðir sem markaðssettar eru til neytenda og stóreldhúsa í Evrópusambandinu þurfa að uppfylla merkingarákvæði í reglugerð ESB nr. 1379/2013 um sameiginlegt markaðskerfi fyrir lagarafurðir og lagareldisafurðir. Merkingaákvæði þessarar reglugerðar taka gildi í desember nk. Reglugerðin er ekki í EES-samningnum og gildir því ekki hér á landi.
Upplýsingar um þessi merkingarákvæði hafa nú verið settar á vef Matvælastofnunar til hagræðingar fyrir útflytjendur fiskafurða og annarra afurða sem undir þessar reglur falla. Um er að ræða merkingar um tegundarheiti, hvort afurðin var veidd í sjó, ferskvatni eða kemur úr eldi, veiði-/eldissvæði, veiðarfæri o.fl.
Afurðirnar sem um ræðir verða einnig, eins og önnur matvæli, að uppfylla reglugerð ESB nr. 1169/2011 um miðlun upplýsinga um matvæli, sem einnig tekur gildi í desember nk. og verður innleidd hér á landi innan skamms.