Eftirlit með áburði 2019
Ársskýrsla áburðareftirlits Matvælastofnunar 2019 er komin út. Helstu niðurstöður eftirlitsins eru eftirfarandi:
Á árinu 2019 fluttu 25 fyrirtæki inn áburð og jarðvegsbætandi efni, alls 302 tegundir. Alls voru flutt inn 46.432 tonn af áburði og jarðvegsbætandi efnum. Innlendir framleiðendur eru 14 á skrá, það eru fyrirtæki sem framleiða áburð eða jarðvegsbætandi efni á landinu. Áburðarfyrirtæki sem voru með skráða starfsemi á árinu eru því 39.
Innflutningur áburðar 2019 (ath. sum fyrirtæki fluttu inn fleiri en einn flokk áburðar):
Notkun áburðar |
Fj. fyrirtækja |
Fj. tegunda |
Magn, kg |
N, kg |
P, kg |
K, kg |
Jarðrækt |
5 |
72 |
43.873.315 |
10.381.257 |
1.428.405 |
2.134.101 |
Ylrækt/garðyrkja |
12 |
94 |
1.823.036 |
228.284 |
51.359 |
238.560 |
Jarðvegsbætandi efni |
4 |
6 |
660.062 |
792 |
0 |
0 |
Íþróttavellir |
1 |
21 |
47.754 |
6.219 |
1.267 |
3.392 |
Blómaáburður |
10 |
109 |
28.150 |
438 |
627 |
910 |
Alls |
25 |
302 |
46.432.317 |
10.616.992 |
1.481.661 |
2.376.965 |
Sýnataka og vöruskoðun fór fram hjá 5 innflutningsfyrirtækjum og voru alls 52 áburðarsýni af 52 áburðartegundum tekin á árinu. Auk þess voru merkingar og umbúðir skoðaðar.
Við efnamælingar kom í ljós að 8 áburðartegundir voru með efnainnihaldi undir vikmörkum samkvæmt ákvæðum reglugerða. Þrjár voru með of lítið köfnunarefni, engin með of lítinn fosfór, tvær með of lítið kalí, 5 með of lítið kalsíum, ein með of lítinn brennistein, ein með of lítið magnesíum og ein með of lítinn bór. Í nokkrum tilfellum mældust fleiri en eitt næringarefni undir leyfðum vikmörkum í sömu áburðartegundinni. Þessar 8 tegundir hafa verið teknar af skrá Matvælastofnunar. Þessum áburðartegundum má ekki dreifa til notenda fyrr en Matvælastofnun er búin að taka sýni af þeim og láta efnagreina og niðurstöður þeirra sýna að áburðurinn stenst kröfur. Allar niðurstöður miðast við uppgefin gildi við skráningu og samkvæmt merkingum á umbúðum.
Kadmíum (Cd) var mælt í öllum áburðartegundum sem innihalda fosfór. Efnið var oftast undir mælanlegum mörkum og alltaf undir leyfðu hámarki sem er 50 mg/kg P.
Fáar athugasemdir voru gerðar við merkingar, en helstu gallar voru vegna misræmis milli skráninga og merkinga. Einnig voru merkingar máðar í nokkrum tilfellum. Þá voru gerðar athugasemdir ef merkingar voru ekki á íslensku.
Ítarefni
Uppfært 21.01.20 kl. 14:16
Uppfært 22.01.20 kl. 13:46