Móðir Jörð hlaut viðurkenningu fyrir lífræna framleiðslu
Hjónin Eymundur Magnússon og Eygló Björk Ólafsdóttir hlutu viðurkenningu atvinnuvegaráðherra fyrir framúrskarandi árangur í lífrænni framleiðslu. Viðurkenningin var afhent á lífræna deginum 19. september sl. Sjá frétt á vef Atvinnuvegaráðuneytis Stjórnarráðið | Móðir jörð hlaut viðurkenningu fyrir lífræna framleiðslu
Eygló og Eymundur eru eigendur fyrirtækisins Móðir jörð í Vallanesi á Fljótsdalshéraði sem um árabil hefur verið brautryðjandi í lífrænni ræktun og matvælaframleiðslu á Íslandi. Lífræn ræktun í Vallanesi hófst formlega árið 1995 þegar býlið fékk lífræna vottun en ræktun með þeim aðferðum á sér lengri sögu á bænum.
Í Vallanesi er nú stunduð lífræn ræktun á korni og fjölbreyttu grænmeti, auk fullvinnslu matvæla úr hráefni sem að stórum hluta er ræktað á staðnum. Þar hefur einnig verið lögð áhersla á skógrækt og skjólbelti.
Sérstök áhersla hefur jafnframt verið lögð á að auka notkun íslensks byggs til manneldis og þróa rétti og vörur þar sem þetta næringarríka heilkorn fær að njóta sín.
Árangur Eyglóar og Eymundar verður ekki aðeins mældur í uppbyggingunni í Vallanesi. Þau hafa rutt brautina í lífrænni ræktun, nýtingu staðbundinna auðlinda og fullvinnslu eigin hráefnis og þannig haft áhrif langt út fyrir eigin starfsemi.
Þau hafa jafnframt miðlað þekkingu á lífrænni framleiðslu og stuðlað að auknum skilningi á möguleikum hennar hér á landi.
Atvinnuvegaráðuneytið óskaði eftir tilnefningum til verðlaunanna og komu til greina einstaklingar, fyrirtæki og félög sem þykja hafa skarað fram úr á sviði framleiðslu, nýsköpunar, vöruþróunar, markaðssetningar, sölu eða kynningar á lífrænum vörum. Afhending viðurkenningarinnar er hluti af aðgerðaáætlun til eflingar lífrænni framleiðslu.
Eymundur tók við viðurkenningunni fyrir hönd þeirra Eyglóar frá Bjarka Pjeturssyni, sérfræðingi á skrifstofu landgæða og dýraheilsu í atvinnuvegaráðuneytinu.
Allir sem rækta, framleiða, geyma, dreifa, selja eða flytja, lífrænt vottuð matvæli eða fóður, inn eða út úr landinu skulu hafa vottun frá faggildri vottunarstofu.