Vegna ólöglegra flutninga sauðfjár
Í gildi eru lög nr. 25/1993 um dýrasjúkdóma og varnir gegn þeim. Þar kemur fram í 25.gr. að óheimilt sé að flytja sauðfé til lífs yfir varnarlínur nema þegar um er að ræða endurnýjun bústofns vegna niðurskurðar af völdum sjúkdóma og/eða vegna búháttabreytinga.
Matvælastofnun vill enn fremur vekja athygli á því að allur flutningur sauðfjár og geitfjár til lífs á milli bæja á svæðum sem teljast til riðusvæða er bannaður. Af sýktu svæði og innan þess er óheimilt að flytja sauðfé til lífs milli hjarða. Eftir að riða hefur verið staðfest á bæ í tilteknu varnarhólfi telst það varnarhólf vera riðuhólf næstu 20 ár á eftir.
Matvælastofnun mun kæra til lögreglu ólöglega flutninga sauðfjár þegar rökstuddur grunur er um slíkt.
Ef riða kemur upp á bæjum þar sem flutningar af þessu tagi hafa átt sér stað geta slíkir gjörningar haft þau áhrif að takmarka eða jafnvel fyrirgera rétti bænda til bóta við niðurskurð.