Synjun á innflutningi hreindýrakjöts frá Grænlandi staðfest
Í desember 2016 synjaði Matvælastofnun fyrirtækinu Esju gæðafæði ehf um innflutning á hreindýrakjöti frá Grænlandi. Fyrirtækið var ósátt við synjunina og kærði hana til atvinnuvega- og nýsköpunarráðuneytis. Ráðuneytið hefur nú nýlega staðfest synjunina og mælt fyrir um förgun vörunnar sem beðið hefur ótollafgreidd í vörugeymslu í Reykjavík.
Ástæða synjunarinnar var að matvælin voru vanmerkt. Grænland er utan evrópska efnahagssvæðisins (EES) og því gildir um þennan innflutning reglugerð um eftirlit með innflutningi á dýraafurðum frá ríkjum utan EES sem sett er m.a. með stoð í lögum um matvæli og lögum um dýrasjúkdóma. Enn fremur gildir um þetta efni Evrópureglugerð (853/2004/EB) sem hefur verið innleidd hér á þessu sviði. Sú reglugerð mælir fyrir um hvernig standa skuli að merkingu afurða sem koma frá þriðju ríkjum og eiga að fara á markað í aðildarríkjunum.
Samkvæmt þessari reglugerð skal koma fram samþykkisnúmer hinnar grænlensku starfsstöðvar á afurðunum á svonefndu auðkennismerki. Tilgangur auðkennismerkis er annars vegar að tryggja rekjanleika vörunnar og veita upplýsingar um uppruna hennar og hins vegar að staðfesta að viðkomandi starfsstöð hafi gilt vinnslu- eða starfsleyfi. Slíkt leyfi á að tryggja tiltekið heilbrigðisástand starfsstöðvarinnar þegar varan yfirgefur starfsstöðina. Skal auðkennismerkið sett á vöruna áður en hún er send frá starfstöðinni. Fyrir lá að auðkennismerkið var ekki auðgreinanlegt á umræddu hreindýrakjöti.
Synjun Matvælastofnunar var því staðfest og skal vörunni fargað eða endursend til Grænlands. Ráðuneytið tekur sérstaklega fram í úrskurði sínum að Matvælastofnun hafi fylgt helstu reglum stjórnsýsluréttarins við afgreiðslu málsins.