Evrópuþing ályktar um einræktun dýra til manneldis

Evrópuþingmenn hafa samþykkt tillögu þess efnis að bann verði sett við klónun dýra til manneldis. Tillagan var samþykkt með 622 atkvæðum gegn 32, en 25 sátu hjá. Þingmennirnir lögðu einnig til að innflutningur á einræktuðum dýrum og afkvæmum og afurðum þeirra verði bannaður og hefur þingið kallað eftir drögum frá Framkvæmdastjórn Evrópusambandsins um bann þess efnis.

Há dánartíðni einræktaðra dýra var meðal helstu áhyggjuefna og voru nýleg álit þess efnis frá Matvælaöryggisstofnun Evrópu (EFSA), siðanefnd Evrópusambandsins (EGE) og fleiri evrópskum sérfræðingum höfð til hliðsjónar. Vitnað var í reglugerð 98/58/EC um verndun á búfé sem bannar aðferðir sem geti valdið viðkomandi dýrum þjáningum eða líkamstjóni og bent á að einræktun geti skaðað ímynd evrópskrar landbúnaðarstefnu sem byggir á umhverfisvænni hágæðaframleiðslu þar sem dýravelferð og heilbrigði eru í fyrirrúmi. Jafnframt höfðu þingmenn áhyggjur að einræktun myndi skerða líffræðilega fjölbreytni búfjár og gera það að verkum að sjúkdómar gætu lagst á heila hjörð á sama tíma, með gríðarlegum afföllum.