Innra eftirlit er eftirlit á vegum framleiðanda eða dreifanda í þeim tilgangi að tryggja gæði, öryggi og hollustu matvæla og að vörurnar uppfylli að öðru leyti þær kröfur sem til þeirra eru gerðar. Innra eftirlit er fyrirbyggjandi aðferð.

Á síðunni má finna ýmsar hagnýtar upplýsingar um innra eftirlit í matvælafyrirtækjum bæði fyrir lærða og leika. Athugasemdir og ábendingar um innihald síðunnar eru vel þegnar.

Laga- og reglugerðarákvæði um innra eftirlit

    Lög um matvæli (23.gr.)

    Matvælareglugerðin (4.gr.)

Út frá fyrirliggjandi upplýsingum í starfsleyfisumsókn og samkvæmt viðmiðunarlista (sjá að neðan) Heilbrigðiseftirlits sveitarfélaga fyrir flokkun fyrirtækja m.t.t. innra eftirlits ræðst hvaða lágmarkskröfur eru gerðar til innra eftirlits viðkomandi fyrirtækis. Ef aðilar telja einstök fyrirtæki ranglega flokkuð eða óvissa er um flokkun, m.t.t. innra eftirlits skal ábendingum um það komið á framfæri við Matvælastofnun. Matvælastofnun fjallar um ábendingarnar í samstarfi við viðkomandi heilbrigðiseftirlitssvæði. Matvælastofnun sér um uppfærslu á viðmiðunarlistanum og kynningu á breyttri flokkun.

Nokkrar staðreyndir:

Matvælafyrirtækin bera sjálf ábyrgðina á sinni framleiðslu. Mörg dæmi eru til um að fyrirtæki komi mjög illa fjárhagslega út úr matarsýkingum/eitrunum. Sumir neytendur ná sér aldrei fullkomlega eftir slík veikindi.

Lög um matvæli og matvælareglugerð skylda matvælafyrirtæki til að starfrækja innra eftirlit til að tryggja gæði, öryggi og hollustu matvæla. Ákvæði í matvælareglugerð eru sveigjanleg því matvælafyrirtæki eru mjög margbreytileg. Innra eftirlitskerfi taka alltaf mið af hverju fyrirtæki. Fyrirtækin gera áætlun um sitt innra eftirlit byggt á sinni starfsemi, þekkingu og metnaði og kröfum reglugerðarinnar.

Heilbrigðiseftirlit sveitarfélaga metur hvort kerfið er nægilegt, fyrst og fremst byggt á því, hvort það telur kerfið taka nægilega á þeim þáttum sem hafa áhrif á öryggi matvælanna.

Gleymum því ekki að þetta er gert fyrir neytendur

ÖRUGG MATVÆLI - ALLRA HAGUR

Ítarefni:

    Áhættuþættir í stóreldhúsum

    Fræðsluefni um verslanakæla

    Eftirlitshandbækur og áhættumat matvælafyrirtækja