• Email
  • Prenta

Þráðormur greinist að nýju

Veikur hundur
16.08.2013 Fréttir - Dýraheilbrigði

Nýtt tilfelli af þráðorminum Strongyloides stercoralis hefur greinst í saursýni úr hundi staðsettum á Suðvesturhorni landsins. Greiningin var gerð á Tilraunastöð Háskóla Íslands í meinafræði að Keldum í síðustu viku. Þessi tegund þráðorma hefur greinst í nokkrum tilfellum í hundum hér á landi utan einangrunarstöðva, en fyrsta slíka tilfellið greindist í febrúar 2012.
Matvælastofnun er nú að skoða mögulegan uppruna smitsins og hvort fleiri hundar gætu hýst þennan þráðorm. Ákvarðanir um aðgerðir munu verða teknar í framhaldi af niðurstöðum þeirra rannsókna.

Stofnunin hefur þegar sent út tilmæli til starfandi dýralækna um að vera á verði gagnvart sýkingu af Strongyloides stercoralis í hundum. Einkenni geta verið niðurgangur, þyngdartap eða hægur vaxtarhraði, en hundarnir geta einnig verið einkennalausir.

Ávallt skal gæta hreinlætis við umgengni og umönnun dýra því ýmsir sýklar geta borist úr dýrasaur í menn. Tíður handþvottur er mikilvægasta smitvörnin, einkum fyrir máltíðir og matarundirbúning. Forðast skal að láta hunda sleikja andlit fólks. Saur hunda skal hreinsa upp, setja í plastpoka og síðan í sorptunnu.  

Ítarefni

Til baka