• Email
  • Prenta

Hrossakjöt ekki notað í stað nautakjöts

Hrátt kjöt
22.02.2013 Fréttir - Matvælaöryggi

Matvælastofnun hefur látið rannsaka íslenskar matvörur á markaði til að kanna hvort þær innihaldi hrossakjöt án þess að þess sé getið á umbúðum. Niðurstöður rannsóknarinnar sýna að hrossakjöti hafði ekki verið blandað í vörurnar. 

Vegna tilfella um íblöndun hrossakjöts í stað nautakjöts í matvörur í Evrópu ákvað Matvælastofnun að láta rannsaka íslenskar matvörur á markaði til að kanna hvort sambærilegt ástand væri hér á landi.

Í því skyni tók Matvælastofnun í síðustu viku 16 sýni af íslenskum matvörum í verslunum. Samkvæmt innihaldslýsingu innihéldu vörurnar m.a. nautakjöt, en engin þeirra hrossakjöt. Sýnin voru rannsökuð á Tilraunastöð HÍ á Keldum og á Matís ohf. Sjá töflu hér að neðan.

Öll sýni voru neikvæð með tilliti til þess hvort um íblöndun á hrossakjöti var að ræða í matvörurnar. Þó gaf eitt sýni, saltkjötshakk frá Fjarðarkaup, jákvæða svörun um það að hrossakjöt væri til staðar. Það sýni var sent í magngreiningu sem gaf neikvæða svörun. Skýringin á þessum mismun í svörum er hugsanlega sú að um sé að ræða óverulegar leifar af hrossakjöti í vinnslubúnaði, en það mun verða skoðað nánar af viðkomandi heilbrigðiseftirliti.

Matvælastofnun mun á næstu dögum fara nánar yfir þær vörur sem teknar voru til rannsóknar með tilliti til innihaldsefna og merkinga þeirra. Nánar verður greint frá niðurstöðum varðandi þessa þætti í næstu viku þegar þær upplýsingar liggja fyrir.

Matvælastofnun og heilbrigðiseftirlit sveitarfélaga munu áfram fylgjast með vinnsluferlum, uppskriftum og merkingum  matvæla í matvælafyrirtækjum í sínu reglubundna eftirliti.

#

Tegund sýnis

Framleiðandi/ábyrgðaraðili

1

Ítalskar lambahakkbollur

Kostur

2

Hamborgarar

Bónus

3

Hakkbuff

Norðlenska

4

Nautabökur

Gæðakokkar, Borgarnesi

5

Hallarborgari

Kjöthöllin

6

Nautahakk

Íslenska kjötfélagið

7

Ungnautahakk

Kostur

8

Nautahakk

Sláturfélag Suðurlands

9

Saltkjötshakk

Fjarðarkaup

10

Lasagna, 1944

Sláturfélag Suðurlands

11

Nautagrillsteik

Kostur

12

Frönsk hvítlauks panna með nautakjöti

Krónan

13

Lasagne, Bónus

Sómi /Bónus

14

Jumbó, kjötloka

Jumbó

15

Jumbó Roastbeef samloka

Jumbó

16

Ungnautahakk

Krónan


Ítarefni

Til baka