• Email
  • Prenta

Svínaflensa greinist á svínabúi

30.11.2010 Fréttir - Fréttir

 


  Svínainflúensa hefur greinst á svínabúinu á Melum í Melasveit. Um er að ræða uppeldisbú sem tekur við grísum frá sex öðrum búum og hafa öll búin verið sett í einangrun til bráðabirgða. Starfsmenn svínabúa voru bólusettir gegn svínainflúensu við komu bóluefnis til landsins á síðasta ári og er lítil hætta á að smitið berist úr svínum í fólk. Til öryggis hefur forráðamönnum svínabúanna verið ráðlagt að láta bólusetja starfsfólk á svínabúum að nýju í varúðarskyni.

S.l. miðvikudag bárust niðurstöður blóðrannsóknar sem sýndi að sex grísir frá svínabúinu Melum í Melasveit og einn grís frá svínabúinu í Hýrumel í Borgarfirði báru mótefni gegn inflúensuveiru A H1N1 sem veldur svínainflúensu. Daginn eftir voru tekin tekin sýni í búinu á Melum til staðfestingar með PCR greiningu og greindust 8 sýni af 13 jákvæð fyrir veirunni.

Á síðasta ári greindist sama svínainflúensuveira á svínabúunum Minni Vatnsleysu og Hraukbæ og talið var að það hefðu verið svínahirðar, sem ekki hafði náðst að bólusetja í tæka tíð,  sem hefðu smitað svínin.  Það sýndi sig að veiran olli aðeins vægum einkennum í svínunum, en samt voru bú þessi sett undir sérstakt eftirlit viðkomandi héraðsdýralækna, enda er sjúkdómur þessi í tilkynningarskyldur og af B flokki, skv. lögum nr. 25/1993 um dýrasjúkdóma og varnir gegn þeim.

Á sama hátt hafa nú svínabúin á Melum og í Hýrumel, ásamt fimm öðrum svínabúum sem tengjast þessum búum, verið sett undir sérstakt eftirlit. Verið er að taka sýni af þessum búum og munu niðurstöður liggja fyrir síðar í vikunni.

Skýrt skal tekið fram að engin hætta er á því að svínainflúensa berist úr svínum í fólk við neyslu á svínakjöti.

Ítarefni



Til baka