Garnaveiki greinist í Fáskrúðsfirði

18.01.2010 Fréttir - Fréttir
  Garnaveiki hefur greinst í þremur ungum ám á bæ í Fáskrúðsfirði. Ærnar voru skoðaðar 6. janúar s.l. að beiðni bóndans á bænum og ákvað héraðsdýralæknir MAST að aflífa þær allar þar sem þær voru óeðlilega horaðar, þótt þær ætu allar eðlilega. Engin merki sáust þó um skitu.

Við krufningu komu í ljós miklar bólgubreytingar í mjógörn við botnlanga sem bentu eindregið til garnaveiki. Sýni voru tekin og send til Tilraunastöðvarinnar að Keldum sem staðfesti garnaveiki, fyrst með litun og síðan vefjaskoðun. Í báðum rannsóknum fannst mikið af sýruföstum stöfum,  garnaveikibakteríum.  


Bólusetningu gegn garnaveiki var hætt í Fáskrúðsfirði haustið 2006 enda hafði verið bólusett þar í áratugi án þess að nokkur grunur vaknaði um að veikin væri enn til staðar.  Ærnar sem fengu veikina voru fæddar 2006 og 2007. Framundan er að hefja bólusetningu á svæðinu að nýju.
 

Ítarefni   



Til baka