• Email
  • Prenta

Námskeið fyrir starfsfólk í fiskvinnslum

16.04.2009 Fréttir - Fréttir

  Matvælastofnun hefur verið í samstarfi við Rannsóknaþjónustuna Sýni og Matís um skipulag námskeiða fyrir starfsfólk í fiskiðnaði á Íslandi.  Það er á ábyrgð matvælaframleiðanda að starfsfólk fái nauðsynlega þjálfun um mikilvægi hreinlætis og góðra framleiðsluhátta í matvælafyrirtækjum.  Það er mat Matvælastofnunar (MAST) að þekking á þessum þáttum sé að mörgu leyti ábótavant og að þörf sé á auknu framboði af námskeiðum.  MAST leitaði því til aðila sem hafa boðið upp námskeið á þessu sviði og hafa þeir sett upp námskeið sem annars vegar eru ætluð almennum starfsmönnum í fiskvinnslu og hinsvegar ætluð þeim er bera ábyrgð á innra eftirliti fyrirtækjanna.   Upplýsingar um námskeiðin má finna á heimasíðum Matís og Rannsóknarþjónustunnar Sýni.

Matvælastofnun hvetur forsvarsmenn fyrirtækja í fiskiðnaði sem og annarra matvælafyrirtækja til að kynna sér námskeiðsframboð þessara aðila og stuðla að því að starfsfólk sæki námsskeiðin.  Í matvælareglugerðum ESB (852/2004, II viðauka, XII. kafla)  sem verða væntanlega innleiddar hér á næstu mánuðum eru skýr ákvæði um að stjórnendur matvælafyrirtækja skulu tryggja að starfsfólk fái nauðsynlega þjálfun í þáttum er varða hollustuhætti í meðferð matvæla. Matvælastofnun ber að fylgja því eftir í eftirliti að starfsfólk fái nauðsynlega þjálfun til að öryggi matvæla sé tryggt.  


Ítarefni



Til baka