Hita- og kælibúnaður

Ávallt skal miðað við að búnaður sé til að halda heitum matvælum heitum (60°C eða meira) á hlaðborðum. Einnig skal vera búnaður á hlaðborðum til að halda kældum matvælum köldum (8°C eða lægra) ef gestir setjast ekki allir til borðs á sama tíma eða matvælin standa lengur frammi en 2 klukkustundir. Sannreynið hitastig með mælingum.

Framreiðsla

Bera skal heitan mat fram nægilega heitan (60°C eða meira). Athugið að oftast dugar hitunarbúnaður á hlaðborði aðeins til að viðhalda hitastiginu ekki til að hita matinn upp.

Geymið matvæli sem bera á fram kæld í kæli (0-4°C) þar til kemur að framreiðslu. Athugið að kælibúnaður á hlaðborðum dugar oftast aðeins til að seinka hitun matvælanna upp í umhverfishita ef ekki er um vélkælingu að ræða.

Athugið að hafa áhöld við hvern rétt til að hindra krossmengun á milli rétta.

Nýting matarleifa

Ef nýta á leifar af heitum mat skal kæla þær í grunnum ílátum eða litlum skömmtum eins hratt og kostur er og geyma við 0-4°C. Hita skal matinn upp undir suðu (a.m.k. 95°C) áður en hann er borinn fram aftur. Ef nýta á leifar af kældum matvælum skal meta hvort hugsanlega hafi átt sér stað krossmengun frá öðrum réttum eða þær náð að hitna yfir 8°C.

Fleygið matarleifum ef einhver vafi leikur á gæðum þeirra.

Mikilvægt er að bera ekki meiri mat en svo á borð að leifar séu innan þeirra marka að ásættanlegt sé að fleygja þeim.