FÆÐUBÓTAREFNI - SKILGREINING
Hver er skilgreiningin á fæðubótarefni?
Skilgreiningin í reglugerð nr. 624/2004, um fæðubótarefni er eftirfarandi:
Fæðubótarefni: Matvæli sem eru ætluð sem viðbót við venjulegt fæði og sem eru með hátt hlutfall af vítamínum, steinefnum eða annars konar efnum sem hafa næringar- eða lífeðlisfræðileg áhrif. Þessi efni geta verið ein sér eða blönduð saman, og eru markaðssett í formi skammta, nánar tiltekið sem hylki, brjóstsykur, töflur, pillur og í öðru svipuðu formi, duftpokar, vökvaampúlur, dropaglös og í öðru svipuðu formi vökva og dufts sem er ætlað til inntöku í mældum, smáum skömmtum.
Málið er augljóst ef um töflur, hylki og þess háttar er að ræða, slíkar vörur eru í öllum tilfellum fæuðbótarefni.
Þegar kemur að „næringarefnablöndum“ á duftformi er málið ekki jafn augljóst. Til dæmis ef um er að ræða næringarduft, sem ætlað er til notkunar í smáum afmældum skömmtum (t.d. 1-2 matskeiðar á dag, allt að 60 g) gæti slík vara flokkast sem fæðubótarefni jafnvel þó að neytandinn hræri duftið út í glasi af vatni. Það er þó skoðun MAST að vara sem innieldur t.d. eingöngu prótein eða eingöngu kolvetni geti ekki flokkast sem fæðubótarefni þar sem slík vara er í raun fæða, og inniheldur ekkert umfram önnur matvæli, enga viðbót við fæðu. Slík vara myndi falla undir lög og reglur sem gilda almennt um matvæli. Þar að auki má nefna að ef vara inniheldur verulegt magn næringar (orku) þá getur slík vara ekki talist sem viðbót við fæðu, heldur er hún fæða.
Ef vara inniheldur hinsvegar íblönduð vítamín, steinefni eða önnur efni með lífeðlisfræðilega virkni gæti sú vara flokkast sem fæðubótarefni sé hún ætluð til inntöku í mældum smáum skömmtum. Ef slík matvaran er ekki fæðubótarefni (sbr. skilgreiningu 2. gr. reglugerðar nr. 624/2004 og skýringar að ofan) og í hana er bætt vítamínum, steinefnum , eða tilteknum öðrum efnum þarf að tilkynna slíka viðbætingu í samræmi við reglugerð nr. 327/2010 um gildistöku reglugerðar Evrópusambandsins nr. 1925/2006 um íblöndun vítamína og steinefna og tiltekinna annarra efna í matvæli.
Tilbúnir drykkir seldir á „stórum“ flöskum geta ekki flokkast sem smáir afmældir skammtar og þess vegna geta hvorki próteindrykkir né orkudrykkir flokkast sem fæðubótarefni. Orku- og próteinstykki flokkast heldur ekki sem fæðubótarefni.
Hins vegar er í dag nokkuð um vörur á einskonar „sopa formi“ (orkuskot, e. energy shot, vitamin shot) en þá er um að ræða litlar flöskur með vökva oft c.a. 60 mL, sem innihalda hátt hlutfall t.d. vítamína og steinefna eða annara efna, oft koffín. Slíkar drykkjarvörur flokkast sem fæðubótarefni.
Ítarefni
Innflutningur og framleiðsla á fæðubótarefnum